OMENATGE  DEL  CENTRE CULTURAL OCCITAN DEL ROERGUE (C.C.O.R)

                            A ROBERT MARTY ALIAS  PADENA

A l’amic Padena que se ‘n es anat als aliscamps d’eternitat

Lo crane garric que èras, s’es ablacat e lo pòble occitan pòrta lo dòl …

Òc, fasiás nòstra fiertat e nòstra jòia …

Per nosautres tos companhs de lucha encarnavas l’amna prigonda del pòble d’òc. Ta vida tota es estada un acte d’amor sens rebrecas  :

     –  per aquela terra que n’èras prestit

      – per aquela cultura e sa lenga occitana que mestrejavas coma degun mai e que sabiás far cantar al travèrs romans, poesias, contes, conferéncias  ect…

Èras tanben nòstra jòia ambe un amor reviscolaire e una facilitat d’abòrd que te fasiá l’aculhida franca, brasses e còrs dubèrts…

Que a pas vist Robert Marty alias Padena sur scena a pas vist rès.

Me tòrna en memòria quant èras presentator de l’Estivada de Rodés , una serada ont sul la plaça Foch comola de monde fasiás rire l’auditòri a ventre debotonat…

Escrivan, animator e contaire de tria, fasiás miranda…

Dins ton mestièr de professor de francés, d’occitan e d’espanhòl, ta pedagogia èra fòrt presada coma dins lo metòdi « Cap a l’occitan »

Ton trabalh al cap de l’IEO nacional marquèt  los esprits.

Reviscolères lo sector de l’edicion ambe IEO-IDECO, un crane prètzfach ! ! !

En Roergue es ambe ton ajuda que tornèrem quilhar la seccion departamentala de l’IEO que s’èra laissada morir.

Òsca per ton ajuda e ton amistat.

Vos parlarai pas de la creacion de l’ostal Bodon a Crespinh que permetèt de ramosar los fidèls aparaires  de la terra d’òc e de far de bon trabalh coma sabètz .

Aquela òbra màger es a vosautres Robert e Josiane que la deven ; vautres s’es estat la cantonada d’aquel ostal d’escrivans qu’ensolheda Joan Bodon, lo Roergue e tota l’Occitania.

Òsca a totes dos per aquel crane trabalh qu’es l’òbra d’una vida.

Ambe vos Dòna Marty e vòstra familha volriam poder partagar la dolor que vos ablaia e vos assegurar qu’al Centre Cultural Occitan del Roergue gardarem viu son sovenir.

“L’amistat es coma la bruguièra una flor que morís pas”.

Paul BONY

Co-President del C.C.O.R

X