archives animations
There are no translations available.

2013:


LO GRAND PASSACARRIEIRA DE RODES- 20 ABRIAL 2013

 

>http://www.passacarriera.en-aveyron.com/

Lo 20 d’abrial se debanèt a Rodés lo Grand Passacarrièira organisat per la Coordinacion Occitana de l’Avairon. Siaguèt una capitada !

Un recampament festiu de mai de 2000 personas, joves e vièlhs mesclats, venguts de pertot per la promocion de la lenga occitana.

A uèch oras del matin, la jornada a commencat per una triponada  puèi de taulhiers davant la sala de las fèstas.

A onze oras : son mai de 300 personas que se trapèron a la catedrala de Rodés per ausir la suberbèla messa occitana del Paire Hubert Fau ambe la particicion de la corala del Faisselièrs d’Agen, de Renat Jurié e de Philippe Vialard.

En seguida de la messa, cap a la plaça de la prefectura, comola de monde per cantar a plen pitral los cants del Roergue. Aprèp abure plan cantat, lo monde se recampan a la sala de las fèstas per manjar.

A doas oras del vèspre son mai de 2000 personas que s’agrumelan per lo depart del grand Passacarrièira.

L’objectiu èra  :

- de monstrar la vida de l’Occitan dins lo monde de duèi

- e l’enveja de viure de la cultura occitana

- un biais agradiu de mostrar a totes los Roergasses la riquessa de nòstra lenga e cultura millenàrias !

- de dire nòstra fièrtat d’èsser occitans dins totas sas manifestacions : lenga, tradicions, expressions, literatura, cants, danças, musica, produches del terrador e saupre faire (forma de Laguiòla, aligòt, vin de Marcilhac…), organisators de fèstas populàrias, artistas…

Los joves escolans, a l’entorn de lor petaçon gigant vestit de cinc mila mots, dubrissian la marcha seguit dels gropes folclorics, los organisators de la fèsta d’Anglars, lo Mac d’Oc, artistas plasticians e lors òbras, Estivada, Los Faisselièrs….

Las vièlhas e los gigants èran taben de la fèsta. Om remarquèt Ramon VII, darrièr comte del Roergue e de Tolosa abans la conquista francesa e Joan Jaurés vengut en vesin de Carmaus per manifestar l’interés que aviá totjorn portat a la cultura occitana.

Aprèp una crana passejada per las carrièras de Rodès, tot lo monde se ramosèt Plaça del Borg.

En seguida de l’apèl al pòble del Roergue d’Enric Mouly, los montanhòls de l’Aubrac menat per André Valadier fagueron retronir lo Masuc. Los vinhairons de Marcilhac lor donèron lo respond ambe lo Saumancés.

Aprèp los mercejaments dels organisators, s’adralhèt la fèsta populara qu’emplenèt tota la plaça. Puèi los eligits presents e los organisators se recampèron per estudiar la situacion de la lenga e la cultura occitanas a l’ora d’ara.

A sèt oras del ser, la cuècha èra presta e l’aligòt filaba a la sala de las fèstas ont fòrça monde se sarravan per sopar e per assistir al concèrt organisat pel Centre Cultural Occitan del Roergue. Un espectacle de granda qualitat ambe Le Comité, Goulamas’k e Gojats of Hedas clavèt auqela subrebèla jornada de frairièra e d’amistat.

An I de la fièrtat occitana o Occitan Pride.

Osca per aquela polida jornada que deurà èsse seguida de maitas.

Ardit…Totes en abans a l’esteba …la rega es duberta

 

2012 :

-CONCERT OCCITAN : SEBAZAC - 10 Mars 2012

MUSICAS OCCITANAS D’ARA

Lo 10 de març a SEBAZAC, dins l’encastre de la Prima Occitana organisada augan pel l’IEO, le CCOR, e TRAT en 4D, lo Centre Cultural Occitan del Roergue organisava un concert ambe tres grops occitans de creation.

Los tres grops BRIC a DRAC, ENLOC e MAURESCA on fach lo bonur de dos cents dançairas que ero a SEBAZAC aquel ser. La festa als sons rock, reggae, duska siaguet subrebèla pendant mai de quatre horas. Siaguet la festa de la joinessa e de la convivencia.

Òsca donc al CCOR e als grops BRICA e DRAC, ENLOC e MAURESCA per aquela crana serada occitana que ne sona forças maitas.

Merces a totes e al cop que ven.

photo 038

-MANIFESTATION OCCITANA : TOLOSA - 31 Mars 2012

TOLOSA CAPITADA !

Lo 31 de març de 2012 es estat una capitada bèla per la lenga occitana ambe 30.000 personas per carrièras a Tolosa e per las lengas regionalas que recampèron mai de 65.000 manifestaires dins França tota per afortir lor dinamica e demandar per elas una lei e d’un estatut.

La Coordinacion «Per la lenga occitana !» se felicita de la mòstra bèla d'unitat de las lengas regionalas que faguèron la pròva de lor dubertura e que diversitat va plan ambe convivéncia e unitat dins l'accion. Avèm mostrat que sèm indignats e que nòstra indignacion nos encamina cap a l’avenidor ambe conviccion. Avèm capitat de botar en lutz la situacion juridica absurda d'aquel patrimòni de França (art 75-1 de la Constitucion) que se trapa sens estatut juridic e que far dependre las accions de far al benvoler d’un elegit o d’un foncionari !

Aquelas manifestacions an complit lor objectiu màger: far dintrar la question de las lengas regionalas dins lo debat de las eleccions presidencialas e legislativas.

Venguèron nos presentar sos engatjaments per la presidenciala :

- lo President del Senat, segond personatge de l’Estat : Joan-Pèire Bel, per lo candidat Hollande.

- la candidata Eva Joly en persona.

- Joan Lassalle, per Bayrou, que faguèt sa presentacion en occitan.

Se son engatjats los 3 a : modificar la Constitucion, ratificar la Carta Europenca, fargar una lei per las lengas regionalas.

Mercejam las 30 000 personas que venguèron a Tolosa per faire avançar la lenga occitana tanplan coma las collectivitats que nos an ajudats, en particulier la Comuna de Tolosa que facilitèt grandament aquela granda capitada.

Mercés de l'estrambòrd de totas e totes, sens doblidar la joinessa qu'es estada plan vista pels mèdias.

Ara l'accion contunha, que lo 31 de març es la debuta d'una dinamica comuna amb las autras lengas e culturas per obténer una lei. Caminam plan e ganharem…après la lutz ua auta lutz !

Las associacions de la Coordinacion :

IEO : Institut d'Estudis Occitans, la Confederacion CALANDRETA, OC-BI parents das classas bilingas del Servici Public

e sos partenaris precioses : CONVERGENCIA OCCITANA, CREO Centre Regional dels Ensenhaires d'Occitan de la Region Miegjorn-Pirenèus.

>http://www.lasetmana.fr/escotar-veire/fotos/3175-anem-oc-2012--lalbum-de-fotos